Mirdita të gjithve

“Që pas takimit të parë me drejtuesit shqiptarë pashë se lashë një përshtypje shumë të mirë. FSHF ka mendim të jashtëzakonshëm për Oto Bariçin. Në garë edhe kroati tjetër, Vlak

Bledar KUKA- Josip Kuzhe e kishte një bindje të fshehtë brenda vetvetes që pas takimit të parë me drejtuesit e Federatës Shqiptare të Futbollit (FSHF) se do të ishte ai trajneri i ri i Shqipërisë. Këtë e rrëfen në një intervistë për gazetën kroate, “Jutarnji List”, së cilës i tregon edhe ndikimin vendimtar të Oto Bariçit.

Kroati shpjegon se pati një takim dyorësh me shqiptarët (normalisht me presidentin Armand Duka). “Besova që pas takimit të parë që prezantimi im dyorësh la përshtypje të mirë tek drejtuesit e federatës, - shprehet Kuzhe, - por më pas u shfaqën kandidatë të tjerë si dhe hynë në histori edhe njerëz të futbollit që nuk janë në atë lartësi që duhen (të ashtuquajtur menaxherë).

Në listën e 35 emrave ishte edhe një kroat që nuk është shfaqur në shtyp, por që gazeta “Korrieri” e ka përfshirë në një listë trajnerësh kroatë që mund të vëzhgoheshin për kombëtaren, listë botuar më 21 prill të këtij viti. Bëhet fjalë për Marijan Vlakun, trajnerin 54-vjeçar që aktualisht është pa detyrë, por që deri në fillim të marsit të këtij viti ishte në krye të Dinamos së Zagrebit.

Takimi i përmendur më sipër mes Dukës dhe Kuzhes ka ndodhur 3 javë para se presidenti i FSHF-së të bënte zgjedhjen, pra rreth datës 29 prill. Sërish në vendimin e Dukës ndikoi fjala e legjendarit Oto Bariç, që largoi si me magji jo vetëm konkurrentët e tjerë, por edhe dyshimet lidhur me të kaluarën e turbullt të Kuzhes jashtë futbollit.

“Drejtuesit e Federatës Shqiptare të Futbollit kanë mendim të jashtëzakonshëm për Bariçin, - u shpreh Kuzhe, - shumë herë më përsëritën se çfarë trajneri i shkëlqyer u tregua ai dhe sesa ndikim pati në zhvillimin e kombëtares shqiptare. Oto foli mirë për mua dhe këshillat e tij patën ndikim vendimtar”.

Gazeta kroate bën shaka me numrin e madh të kandidaturave për detyrën e lënë në mes nga Ari Hani. “Kjo maratonë bisedimesh u shenjua nga invazioni i kandidatëve, a thua se shqiptarët e kërkuan nëpërmjet portalit “mojposao” (puna ime – adresë kroate për kërkim pune).

Kuzhe thotë se parashikon që të punojë për 2.5 vjet në Tiranë, ndërsa pohon se njeh të paktën dy lojtarë shqiptarë me të cilët ka punuar, Erion Bogdanin dhe Ervin Skelën. Me Bogdanin punuan tek NK Zagrebi ndërsa me mesfushorin e sotëm të Kotbusit kur ky ishte te Kemniceri.


--------------------------------------------------------------------------------

“Portugalia, Danimarka, Suedia kanë rëndësi”

“Viti i parë, - thotë Kuzhe, - është vit njohjeje dhe rrahje mendimesh. Skuadra nuk ka mundësi të shkojë në Botërorin e Afrikës së Jugut, por kjo nuk do të thotë se ndeshjet ndaj Danimarkës, Portugalisë dhe Suedisë nuk kanë rëndësi. Në fund të fundit, na intereson rezultati sportiv”.

--------------------------------------------------------------------------------


Kuzhe sjell edhe trajnerin e Shpresave: Xhemal Mustedanagiç

-Duket se trajnerët kroatë do të marrin krejtësisht përgjegjësinë në futbollin shqiptar sepse keni propozuar si trajner të Shpresave Xhemal Mustedanagiçin, aktualisht skaut i Dinamos së Zagrebit.
“Besoj se do të jetë trajner i ekipit të Shpresave, por nëse kjo për arsye të ndryshme nuk bëhet, ai do të jetë ndihmësi im”.

-Thuhet se Federata Gjermane e Futbollit ndërhyri për të caktuar një trajner të sajin (ndoshta Lorantin apo Zidken).

“Trajnerët kroatë janë mes më të mirëve në botë, E di që kur kam qenë në Japoni. Problemi është se skena kroate është e vogël. Nuk kemi kaq shumë marketing, federata jonë nuk ka kaq fuqi sa disa federata të tjera evropiane apo botërore”.

-Pse kaq shumë emra trajnerësh kroatë në listën shqiptare?

“Shqiptarët këmbëngulën që trajneri të ishte nga këto anë. Kanë pasur edhe gjermanë e holandezë, por Oto Bariç ka lënë shenjë të thellë”.

-Një pyetje jo e këndshme. A prishi punë e kaluara juaj?

“Nuk dua të flas për jetën private. Askush nuk ka të drejtë të hyjë në të. Kam një familje të shkëlqyer, ku jetoj i lumtur, plot me dashuri. Shumëkush do të ishte me fat të kishte një familje të tillë. Gjithnjë kam mbështetje, familja është forca ime”.

-Kur shkoni në Shqipëri?

“Të premten (sot). Synimi ynë është i përcaktuar, eliminatoret e Euro 2012. Shqipëria është aktualisht “klasë e katërt” në eliminatoret evropiane, por ka shumë lojtarë të rinj interesantë, ka shumë ambicie ndaj edhe për mua kjo kombëtare është nxitje e madhe. Besoj se do të bëj punë të mirë”.
Përgatiti nga “Sportalica.net” Bledar Kuka


Bariç: Shqiptarët deshën Bllazheviçin, Kranjçarin

“Josip Kuzhe ishte veçse opsioni i tretë i shqiptarëve”. Kështu shprehet Oto Bariç për gazetën “Javno”. “Më pyetën për Çiron (Mirosllav Bllazheviçin), por u thashë se ai është me Bosnjë-Hercegovinën, pastaj më pyetën për Cicon (Zllatko Kranjçarin), i thashë se kishte shkuar në një klub sllovak, pastaj më pyetën për Kuzhen dhe i thashë se është njeriu i duhur”, - shpjegon Herr Oto.

“Ata (shqiptarët) janë kombëtare e rangut të tretë ose të katërt në Europë dhe në grup gjithnjë kanë dy ose tri kombëtare të forta, - vazhdon Oto Maksimale, - por kjo nuk e pengon federatën shqiptare që të synojë gjithnjë kualifikimin për në një turne të madh”. Më pas ai shton se “pikërisht kjo ishte arsyeja që ika sepse nuk mund t'u premtoja një sukses të tillë me një kombëtare që realisht nuk e ka atë cilësi që të ndodhet mes më të mirave”.


Xhemal Mustedanagiç: Synojmë Euro 2012-ën

Ai që ende nuk është bërë as ndihmës i Kuzhes dhe as trajner i Shqipërisë U21, pra Xhemal Mustedanagiç, jep deklarimet e para si “shqiptar”. Gazeta “Javno” e telefonon dhe ai hidhet menjëherë në sulm: “Këtë edicion nuk ka shanse, por në eliminatoret e Euro 2012-ës duhet të synojmë gjëra më të mëdha, historike”. “Mund të jem trajner i Shqipërisë U21, skaut ose ndihmës i Kuzhes siç kemi bërë tek Dinamo me Eduardon, Çorlukën, Modriçin e të tjerë”, - përfundon ai.

Kroati njihet për pasionin e tij për paratë, për të cilat braktisi Ruandën. “Kumarxhiu”: “Kam stërvitur Bogdanin, Bariç më rekomandoi Shqipërinë”

“I kam të gjitha cilësitë e duhura për të drejtuar Shqipërinë, për të përzgjedhur lojtarët dhe bërë një ekip të mirë. Synimi im është që ta përmirësojë sa më shumë këtë ekip. Kam ambicie të mëdha”. Deklarata është e trajnerit kroati Josip Kuzhe (57 vjeç, 27 vjet eksperiencë si trajner), që mesa duket ka fituar “betejën” me bashkëkombasin e tij Ilija Lonçareviç (65 vjeç) dhe austriakut Peter Pakult (50 vjeç) për vendin vakant në krye të Kombëtares pas shkarkimi të holandezit Ari Han (15 prill 2009).

Ish-trajneri kampion i Dinamos së Zagrebit (2006), por me një eksperiencë punë në Gjermani, Australi e Japoni, i vlerësuar si një teknik inteligjent, pati një takim “kokë më kokë” me presidentin e Federatës Shqiptare të Futbollit, Armand Duka, me të cilin mesa duket ka gjetur dhe akordin formal, që rezultoi edhe një konferencë të improvizuar shtypi në ambientet e selisë së futbollit shqiptar, ku shfaqi edhe disa nga idetë e tij.

“Gjithë kohës që Oto Bariç ka qëndruar në Shqipëri, kam ndjekur vazhdimisht rezultatet e kombëtares suaj. Bariç më ka folur gjithmonë shumë mirë për futbollin shqiptar. Ishte ai që më shprehu dëshirën që unë të bëhesha trajneri i Shqipërisë, duke më shpjeguar shumë gjëra të tjera”, - tha Kuzhe, për të cilin ka dhënë konsiderata pozitive edhe ish-trajneri i Kombëtares shqiptari, Oto Bariç.

“Synimi më i madh për mua është, që nëse do të jem në krye të Shqipërisë, parësore është të kem rezultate. Oto Bariç më ka shpjeguar që me Shqipërinë mund të kesh arritje të mëdha”, - thkesoi Kuzhe.

Tekniku i ri (me 90 përqind Kuzhe), i pesti që do të drejtojë Shqipërinë që nga viti 2002, do të udhëheqë Kombëtaren shqiptare të futbollit për tri ndeshjet e mbetura për eliminatoret e Botërorit 2010 e komplet fushatën kualifikuese të Kampionatit Europian 2012.

Kuzhe, një adhurues i yllit të Milanit, brazilianit Kaka, ka pranuar mesa duket 300 mijë eurot e kontratës e e me “sakrificën” për ca muaj më shumë qëndrimi në “karantinën” shqiptare.

“Kam qenë unë ai që kam marrë Erjon Bogdanin të Rijeka në vitin 1999, duke besuar se ai ishte një lojtar i talentuar. profili që unë kam në kokë për një futbollist si Erion Bogdani, më ndihmon shumë për të krijuar një ide për lojtarët e tjerë shqiptarë.

"Mua më pëlqen individualizmi te lojtarët dhe për këtë mund të them se lojtarët shqiptarë janë individualistë të mirë. Janë të bukur në lojën e tyre, janë atraktivë. Por në anën fizike, pra të kondicionit të tyre, janë mundësitë për t'u përmirësuar”.

Më 6 qershor, Shqipëria do të ndeshet me Portugalinë për eliminatoret e Botërorit, dhe trajneri i ri ka vetëm 20 ditë në dispozicion për të përgatitur ndeshjen, teksa është e natyrshme që lista e lojtarëve do t'i propozohet nga FSHF-ja.

“Synimi më i madh për mua është, që nëse do të jem në krye të Shqipërisë, parësore është të kem rezultate. Oto Bariç më ka shpjeguar që me Shqipërinë mund të kesh arritje të mëdha. Siç e tha edhe presidenti (Duka), unë jam një nga kandidatët e mundshëm për të drejtuar kombëtaren.

"Nëse do të jem trajner i Shqipërisë, vij për dy arsye tepër të forta: së pari, për anën profesionale dhe së dyti, dua të fitoj në drejtimin e Shqipërisë. Dua të arrij rezultate shumë të mira. Jam i lumtur nëse do të jem dhe se dua që të jetoj në Shqipëri, për t'i njohur sa më mirë njerëzit këtu. Dua që të ndihem mirë dhe të punoj për të arritur rezultate, sepse Shqipëria ka shumë talente”.

Kuzhe, i njohur edhe nofkën “kumarxhiu”, për shkak të pasionit të tij të hershëm për ruletin, ka drejtuar vetëm për pak muaj përfaqësuesen e Ruandës (tetor 2007-janar 2008), pavarësisht se federatën e vendit afrikan kishte nënshkruar një kontratë 3-vjeçare, duke zëvendëduar në detyrë gjermanin Mikael Nees, pasi ky i fundit nuk arriti ta kualifikojë Ruandën në finalet e Kupës së Afrikës 2008.

Në turneun e parë me Ruandën (Sesafa Cup të luajtur në dhjetor 2007 në Tanzani), arriti ta shpallë skudrën e tij nënkampione, duke humbur me penallti pas rezultatit 2-2 në kohën shtesë. Kuzhe tha atëherë për radion britanike “BBC”, se ai ndihej krenar për arritjen e tij.

“Ne humbëm me penallti, pavarësisht se ne e meritonim të fitonim. Është një arritje e madhe për ne të arrijmë në finale. Tani ne duhet të përgatisim ekipin për kualifikueset e Kampionatit Botëror 2010”.

Gjithsesi, Kuzhe e braktisi Kombëtaren e Ruandës (6 ndeshje; 4 fitore, 1 barazim, 1 humbje) pas vetëm dy muajsh punë, për t'ui drejtuar Japonisë, nga ku mori një ofertë prej 270 mijë eurosh në sezon prej JEF Junaitid.

Sipas deklaratave të Kuzhes në gazetën kroate “Jutarni List”, ndarja me Ruandën ishte miqësore, ndërkohë që theksoi se “kaloi dy muaj të shkëlqyer në Ruanda, por nuk mund të refuzonte ofertën surprizuese të Japonisë”.

Kuzhe u shkarkua nga drejtimi i skuadrës japoneze pas vetëm katër muajsh punë pas një humbjeje 3-0 kundër Uravës. Gjithsesi, Kuzhe gëzoi simpatinë e disa trajnerëve në Japoni. “Ai e nisi punën nga zero, pasi ekipit iu larguan disa lojtarë, por dhe klubi ndryshoi gjithë stafin e presidentin”, - tha Gertt Engels, trajneri i Uravës.

Ende nuk dihet më saktësi, nëse do të jetë Kuzhe trajneri i Shqipërisë, dhe a do ta braktisë ai Kombëtaren tonë, nëse ndonjë ekip do t'i ofronte pak më shumë se 300 mijë euro për dy vite punë.

Gjashtë gola, nga tre për çdo ekip “çmendin” 12 mijë shikues në “Qemal Stafa”. Elvin Beqiri gaboi në penalltinë fatale, Milani fiton trofeun “Taçi Oil”

Nga stadiumi “Qemal Stafa”, Dash Frashëri- “Gjahtari i golave”, Pipo Inzagi, me goditjen e pagabueshme nga seria e penalltive (5-4), ndihmoi Milanin të fitonte për herë të parë trofeun ndërkombëtar “Taçi Oil Albania Reads”, ndryshe nga tetori i vitit të kaluar kur humbi me Tiranën (2-1), por Shqipëria “B”, me talente premtues si Vila, Muzaka e Salihi, ia doli të mbyllte 90 minutat e kohës së rregullt me një rezultat joshës 3-3, ku për kuqezinjtë italianë shënuan dy fituesit e “Topit të artë”, Ronaldinjo e Shevçenko si dhe Filipo Inzagi. Shqipëria (ende pa trajner zyrtar) zhvilloi një lojë të pëlqyeshme, duke përmbysur disavantazhin 0-2. Trofeun kapitenit të Milanit në pjesën e dytë, Inzagit, ia dorëzoi Presidenti i Republikës, Bamir Topi, i cili tha gjatë ceremonisë se “dalim të gjithë të emocionuar pamë spektakël, me një ekip të madh si Milani. Urime fituesit, pro dhe ne kemi një skuadër të madhe”. Dorëzimi i trofeut u shoqërua me një shi fishekzjarrësh e me një duartrokitje të fuqishme për një mbrëmje të madhe e të jashtëzakonshme.

PJESA E PARË

Trajneri i Shqipërisë, Artan Bushati, luajti me dy sulmues të mirëfilltë, duke hedhur në vijën e parë Hamdi Salihin e Migen Memellin, të mbështetur nga Dorian Bylykbashi e Klodian Duro, në rolin e tij natyral të fantazistit. Nga ana e tij, trajneri i Milanit, Karlo Ançeloti, i besoi sulmin nga minuta e parë Patos e Shevçenkos, me Ronaldinjos pas dhe Pirlon në rolin e regjisorit fuqiplotë të lojës. Kaka, Bekam e Sedorf u kursyen për pjesën e dytë.
Në minutën e 4-t, mesfushori i Dinamos, Elis Bakaj lëshoi një top nga e majta për sulmuesin Migen Memelli, ky i fundit e goditi me kokë brenda zonës milaneze, por topi u largua pa asnjë rrezik nga Milani. Në të 8', Dorian Bylykbashi lëshoi një top për Hamdi Salihin, sulmuesi shkodran ndërmorri një lëvizje vertikale drejt qëndrës, duke goditur fort nga 18 metra, por Kalac ishte në pozicion. Në dhjetë minutat e para, disa veprime virtuoze të Ronaldinjos ngrohin atmosferën në stadium, që deri në atë moment ishte shumë i ftohtë.
Në minutën e 16-të, Klodian Duro u zhvendos bukur në këndin e djathtë të sulmit tonë, pasoi me zgjuarsi për Hamdi Salihin, ky i fundit bëri një rotullim të bukur me topin brenda zonës së vogël, por sfera e goditur ulët nga shkodrani doli jashtë kuadratit. Dy minuta më pas gjatë një tentative për të larguar topin, pas një kërcimi të fuqishëm me kokë, Vrapi dëmtoi pak Andrea Pirlon, por futbollistët shkëmbejnë duart miqësisht.
Minuta e 20-të prodhoi edhe një super-kombinacion midis Pirlos e Ronaldinjos, braziliani bëri xhonglimin tradicional të tij, duke u ndërfutur midis Beqirit e Vrapit, por Sheva u zu në pozicion jashtë loje brenda zonës sonë.
Minuta e 22-të. Shqipëri-Milan 0-1. Pas një gabimi të Vangjelit, Antonini zotëroi topin brenda zonës sonë, kombinoi mënjeherë me Ronaldinjon, e braziliani shënoi me një veprim të zgjuar, duke goditur në mënyrë cinike në anën e djathtë të portës së mbrojtur nga portieri i Palermos, Samir Ujkani.
Në fundin e pjesës së parë, Pato i shpëtoi mbulimit të Vrapit, ky i fundit e ndërpreu në mënyrë të parregullt dhe gjyqtari Lorenc Jemini dha faull. Pato gjuajti nga 25 metra, por goditja e brazilianit ishte shumë jashtë kuadratit.

PJESA E DYTË
Fraksioni i dytë nisi me Kakanë e Sedorfin në fushë, ndërsa Inzagi bëri nxehjen në pistë. Pa kaluar tri minuta nga pjesa e dytë Milani shënoi golin e dytë me anë të ukrainasit Andrij Shevçenko, ish-sulmuesi i Celsit mori një top nga Kaka, dhe me një supergoditje ia rrëshqiti topin mes shalës Ujkanit të “vogël”, duke sjellë edhe të qeshura në stadium. Shqipëri-Milan 0-2.
Në minutën e 64-t, anësori i Tiranës, Gjergji Muzaka dha një pas të artë për Vilën, talenti i ri durrsak tregoi klasin e tij, duke shënuar një gol për manual në portën e Milanit, e duke rritur adrenalinën ën shkallët e tifozëve, të cilët thirrën pareshtur “Shqipëri...Shqipëri!”. Shqipëri-Milan 1-2.
Një gol i merituar i Vilës, që padyshim ka për ta mbajtur gjatë në kujtesë, pasi u realizua pikërisht në debutimin e tij të parë me fanellën e Kombëtares. Durrsaku 20-vjeçar shndërrohet kështu në një nga shpresat më të mëdha të futbollit shqiptar, pavarësisht se këtu flitet vetëm për një ndeshje miqësore ndërkombëtare, por në një ndeshje kundër Milanit të madh.
Kuqezinjtë tanë rrisin presionin, ndërkohë që Ançeloti fut Inzagin në vend të Shevçenkos, ndërsa doli edhe Ronaldinjo në minutën e 69-të. Në minutën e 70-të, Muzaka realizoi një tjetër kryevepër, duke i çuar shifrat në 2-2 brenda gjashtë minutave. Shqipëri-Milan 2-2. Goli i dytë i Muzakës kundër Milanit, përfshirë edhe atë në fitoren 2-1 të Tiranës tetorin e vitit të kaluar.
Në të 75', erdhi radha e Salihit për të firmosur golin e radhës. Klodian Duro veproi bukur brenda zonës nga e djathta e sulmit tonë, krosoi ëmbël për Salihin dhe aty shkodrani me një goditje perfekte me kokë çoi në delir tifozerinë shqiptare. Shqipëri-Milan 3-2
Në minutën e 88-të, Kaka dëshnmoi klasin e tij, duke kaluar si “piramida” mbrojtësit tanë e duke nxjerrë përballë portës “gjahtarin” e golave, Pipo Inzagin, ky i fundit nuk fali, duke vendosur shifrat në 3-3. Një gol me të vërtetë i mrekullueshëm nga ana e Milanit. Në minutën e 92-të, Hyka u tregua një magjistar i vërtetë, me driblimin e tij, pasoi djathtas te Muzaka, ky krosoi drejt portës, e aty Franc Veliu goditi bukur me kokë, por pa mundur të shënojë.

PENALLTITË
Me ndeshjen e mbyllur në barazim 3-3, dy skuadrat iu drejtuan gjuajtjeve të penalltive për të përcaktuar fituesin e trofeut të dytë “Taçi Oil Albania Reads”. Kaka goditi i pari nga pika e bardhë, duke shënuar për Milanin, 1-0. Pisha ishte i pari që gjuajti i pari për Shqipërinë, duke shënuar edhe ai, 1-1. Sedorf për Milanin shënoi me një gjuajtje të bukur teknike, 2-1. Muzaka realizoi, 2-2. Francezi Flamini, 3-2. Vila, i jashtëzakonshëm, 3-3. Tiago Silva, 4-3. Vrapi, 4-4. Pipo Inzagi, 5-4. Elvin Beqiri, gabon duke e nxjerrë jashtë mbi traversë topin. Milani fitoi me penallti 5-4, duke fituar edhe trofeut të dytë “Taçi Oil Albania Reads”. Kupën e argjendtë, prej 7kg e të prodhuar në Itali, iu dha Milanit nga presidenti i Republikës, Bamir Topi, në një sfond muzikor me kolonën zanore të Milanit.


SHQIPËRI-MILAN 3-3
Shënues: Vila, Muzaka, Salihi/ Ronaldinjo, Shevçenko, Inzagi 88'
Me penallti Milani fitoi 5-4. Elvin Beqiri humbi penalltinë e fundit për Shqipërinë.



12 mijë tifozë

Rreth 12 mijë të pranishëm në “Qemal Stafa”, ku mbizotëronte ngjyra e kuqe brohoritën fort golat e Milanit, të realizuar nga Ronaldinjo e Shevçenko e Inzagi, por edhe për golat e jashtëzakonshëm të Emiljano Vilës, Gjergj Muzakes e Hamdi Salihit. Në “Qemal Stafa” ishin të pranishëm grupimi “Tifozat Kuq e Zi”, “Red Black sincë 1443” dhe “Fanatics” të Tiranës. Edhe ndonjë “Milan vafan...” u dëgjua në ndonjë rast.

Soni “ndez” Ronaldinjon

Këngëtarja e njohur Soni Malaj, e veshur në mënyrë provokuese në një fustan shumë të hapur rozë në version seksi, përformoi përpara startimit të ndeshjes, nën vështrimin e “epshëm” të Ronaldinjos, Pirlos, por dhe të “ashprit” Xhenaro Gatuzo, kapiteni i Milanit në këtë miqësore. Nga Shqipëria shiritin e kapitenit për herë të parë e mbajti Klodian Duro.

Ançeloti “ngatërron” udhëzimet

Në pushimin e ndeshjes, nën tingujt e ëmbël të bukuroshes Soni Malaj, e shoqëruar nga dy vajza të hijshme, Ançeloti u dha udhëzimet e rastit Kakasë e Flaminisë, por duke kthyer disa herë kokën nga Soni. Edhe Sedorf nuk mund t'i mungonte listës së admiruesve të këngëtares shqiptare.

“Nxehet” Kaka dhe buzëqesh

Dalja në nxehje e yllit brazilian Riki Kaka u prit me duartrokitje frenetike nga tifozët. Fituesi i “Topit të artë” iu kundërpërgjigj me buzëqeshje dhe përshëndetje me duar. Sedorf, nga ana e tij bëri disa vrapime të shpejta në pistë, duke entuziazmuar tifozët e tribunës D1. Në nxehje ishte edhe Zambrota, Flamini.

Kaka jep autografe për “Kaka”

Disa fëmijë të ngarkuar për t'u ngarkuar për të kapur topat arritën të merrnin autografe nga Kaka, por më i veçantë ishte një fëmijë i vogël, rreth 4 vjeç, i cili ishte veshur me një bluzë të Milanit me numrin 22, numrin e emrin e Kakasë. Braziliani i sheh numrin dhe i jep një autograf me shumë kënaqësi. Ronaldinjo u pushtua nga dhjetëra fëmijë, e po kështu edhe Shevçenko.

Dy çeqe, 80 mijë euro

Në pushim të ndeshjes, Presidenti i “Taçi Oil”, Rezart Taçi, administratori i Milanit, Galiani, dy çeqe në vlerën e 30 mije eurove për “UNICEF”-in dhe 50 mijë euro për fondacionit të fëmijëve shqiptarë “Domenico Scaglione”. Zonja Liri Berisha dha nga a saj dhurata për Galianin e Taçin.

Tribuna “VIP”

Presidenti i Republikës, Bamir Topi, nuk kishte si të mungonte. “Rolin” e kryeministrit Berisha e luajti bashkëshortja e tij, Liri Berisha. Një numër i konsiderueshëm ministrash ishin të pranishëm në ndeshje, për të mos harruar deputetët.

Jemini mban premtimin

Gjyqtari i takimit Lorenc Jemini, një tifoz i thekur i Juventusit, kishte “premtuar” para medias se do t'i nxirrte një karton të verdhë Kakasë, sapo t'i jepej mundësia. Shkaku është intrigues. Gruaja e gjyqtari është tifoze e çmendur e Milanit dhe personalisht Kakasë. Jemini nuk hezitoi ta ndëshkonte, duke sjellë edhe të qeshura në stadium.

Bujar Qesja (PANORAMA SPORT) - As që e çon ndërmend të marrë postin e lënë bosh nga Haan. Sipas tij një rezultat pozitiv ndaj Milanit sonte në "Qemal Stafa" nuk do të ndryshonte aspak programin e drejtuesve të Federatës Shqiptare të Futbollit dhe ca më pak axhendën e tij. Koshient për forcën e kundërshtarit trajneri emergjent i kuqezinjve për këtë takim, Artan Bushati shprehet optimist më së shumti për motivacionin që kanë futbollistët e tij përballë Yjeve si Kaka, Bekam ose Ronaldinjo. "Edhe skeptiku më i madh i kombëtares do t'ia bënte "hallall" edhe disavantazhin. Fitorja jonë e madhe është të fitojmë të ardhmen e futbollit" është shprehur Bushati në një intervistë për gazetën Panorama.
Si do ta konsiderojmë këtë ekip, kombëtare B apo një seleksion i mbledhur rishtas kushtëzuar nga emergjenca e momentit?
Sigurisht që është një seleksion, pasi në përbërje janë lojtarë të përfaqësueses A si Salihi, Duro, Bylykbashi, Bakaj, Memelli, Agolli, Vrapi dhe Bulku. Pra nga 20 futbollistë të grumbulluar, 40 përqind i takojnë ekipit të zakonshëm të përfaqësueses.
Komenti juaj për "emërimin" në këtë detyrë nga FSHF-ja?
Mungesa e trajnerit të ekipit përfaqësues dhe pamundësia për të grumbulluar ekipin e mirëfilltë të A-së, FSHF-ja ishte e mendimit që këtë situatë delikate ku ndodhemi ta plotësojë me këtë vendim.
Ju janë vënë kushte për të grumbulluar emra të caktuar futbollistësh?
Absolutisht jo. E konsiderova veprim krejt normal të drejtoja një seleksion, ku ndërtimi i tij mu besua plotësisht mua. Dhe është më se e justifikueshme që kombëtarja që zbret sot në "Qemal Stafa" përballë Milanit të famshëm, të ndërtohej me futbollistë me përvojë të mirë ndërkombëtare dhe me ato të rinj që kërkojnë karrierën në kësi ballafaqimesh spektakolare.
Këto afirmime vlerash nuk kanë kosto?
Ndjehem komod në këtë përzgjedhje, pasi mbi rezultatin më është kërkuar të "hedh" në fushën e lojës lojtarë të talentuar me synimin e mbështetjes tek ta në takimin e ardhshëm ndaj Portugalisë. Jemi me shans që këtë testim e bëjmë pikërisht me Milanin e madh, ku edhe gabimet e disa futbollistëve debutues do përligjeshin në formën më justifikuese.
E trajtoni këtë ndeshje edhe si pasaportë, e cila mund të shërbejë si leje kalimi në shkallët e karrierës tuaj si trajner?
Të fitosh ndaj Milanit është më shumë se karrierë. Por për momentin vëmendja ime nuk është përqendruar më shumë këtu, se sa evidentimi i elementit të ri dhe prezantimi i tyre cilësor. Dhe në se do ta kemi atë fat, që të kombinojnë që të dyja fitorja dhe performanca inkurajuese e lojtarëve të rinj, do të ndjehesha vërtet i lumtur.
Mund ta përballojë kjo kombëtare Milanin e frikshëm, apo në fund të fundit këto janë mundësitë e momentit?
Duhet sqaruar një fakt. Ne nuk testojmë Milanin por futbollistët tanë. Ma do mëndja që edhe më skeptiku i kombëtares shqiptare, do t'ia bënte "hallall" edhe dizavantazhin. Fitorja jonë e madhe është të fitojmë të ardhmen e futbollit.
Lojtarët e tjerë të kombëtares A u sakrifikuan për hir të afirmimit të lojtarëve të rinj?
Jo. Do të dëshironim të kishte të tjerë titullarë të përfaqësues A, por ata e kishin të pamundur për t'iu përgjigjur kësaj date. UEFA nuk e ka këtë ditë të përfshirë në kalendarin e saj dhe klubet e huaja s'kanë ndërmend të rrezikojnë futbollistë e tyre në miqësore të tilla. Janë paraqitur vetëm shtatë lojtarë nga kampionatet e huaja dhe pjesa tjetër është plotësuar me kontigjentin e klubeve shqiptare.
Në se fitoni ndaj Milanit, besoni se kandidatura për në ekipin A të përfaqësueses jeni ju dhe jo një trajner i huaj?
Më duket se kjo tingëllon më shumë si fantazi se sa realitet. Përsa i takon trajnerit të kombëtares mendoj se duhet të jetë teknik për futbollin shqiptar dhe jo për popullin. Jo se këtë detyrë nuk mund ta bëjnë ndonjë trajner shqiptar, por jam i mendimit se në kushtet ku ndodhet futbolli ynë është më se e udhës që drejtimi i kombëtares ti dorëzohet një trajneri të huaj.
Mund t'ia rezervoni privilegjin të parës, gazetës Panorama Sport për të bërë publik formacionin e mundshëm të ekipit?
Deri tani nuk kam asnjë ide. Mbase pas stërvitjes së sotme, kur të kem sqaruar dhe verifikuar disa dilema mund të krijoj një lloj bindje për ata që mund të aktivizohen. Megjithatë konsideratat për gazetën Panorama Sport, pa mbajtur asnjë rezervë për arsyet që shpreha, nuk mundem t'ju ndihmoj qoftë t'ju shuaj edhe kureshtjen.
Të 20 lojtarët e grumbulluar pritet të aktivizohen?
Do të mundohem të bëj maksimumin për ti aktivizuar. Veçanërisht jam në ethe për të ditur se si mund të paraqiten lojtarë të tillë si psh Vila, që nuk kanë pasur rastin ti ofrohen kombëtares së madhe e jo më të luajnë.

Kuqezinjtë italianë zyrtarizuan listën e 23 futbollistëve. Ky është edicioni i dytë i trofeut “Taçi Oil Albania Reads

Dash Frashëri- Futbolldashësit shqiptarë do të përjetojnë emocione të mëdha të martën e ardhshme, më 12 maj, kur Milani - klubi rekordmen përsa i përket trofeve ndërkombëtarë - do të luajë për herë të dytë në “Qemal Stafa”. Fansat më të guximshëm e sigurisht më fatlumë do të kenë mundësinë t'u marrin autografe emrave më të mëdhenj të futbollit botëror si Bekam, Kaka, Gatuzo, Pato, Ronaldinjo, Shevçenko, Inzagi, Zambrota, të cilët do të jenë të pranishëm në edicionin e dytë të trofeut “Taçi Oil Albania Reads”, që tashmë ka marrë ngjyra ndërkombëtare, duke qenë i vetmi i këtij lloji që luhet në Shqipëri.

PARADË YJESH
Zyra për median pranë kompanisë lider e karburanteve në Shqipëri, “Taçi Oil International” zyrtarizoi listën e 23 yjeve të Milanit, që do të vijnë në Tiranë, ku padyshim epiqendra e vëmendjes do të jetë Rikardo Kaka, pasi zor se braziliani do të ketë rast tjetër të vijë me përfaqësuesen e Brazilit për të luajtur kundër Kombëtares sonë. Ndryshe nga hera e parë në tetor të vitit të kaluar, kur mungonin për shkak të impenjimeve ndërkombëtare shumë prej lojtarëve kryesorë të skuadrës, këtë herë 17-herë kampionët e Italisë do të jenë me të gjithë efektivin e tyre “Qemal Stafa”. Kështu, këtë herë, përveç Ronaldinjos dhe Shevçenkos do të jenë edhe Kaka dhe Pato (në tetor të dy ishin të grumbulluar me kombëtaren braziliane). Por këtë herë risia është mesfushori anglez, i famshmi Devid Bekam. Për të ardhja në Shqipëri nuk është hera e parë, teksa Bekam ka qenë pjesëtar i kombëtares angleze kur ajo luajti në “Qemal Stafa”, në vitin 2002 me Shqipërinë. Përveç tre “topave të artë”, siç janë Kaka, Ronaldinjo dhe Shevçenko, në Tiranë pritet të vijnë edhe të paktën katër kampionë bote, që kanë fituar kampionatin e fundit botëror me Italinë në “Gjermani 2006”: Inzagi, Pirlo (ishin herën e parë), Zambrota e Gatuzo.

KOMBËTARJA SHQIPTARE
Edhe pse nuk është publikuar ende një listë zyrtare e lojtarëve që do të përbëjnë ekipin shqiptar, disa nga emrat janë bërë të njohur nga mediat. Sipas burimeve nga FSHF-ja në “Kombëtaren B” priten të luajnë edhe legjionarë të tillë si Klodian Duro, Jahmir Hyka, Isli Hidi, Dorian Bylykbashi, Ervin Bulku, Kristi Vangjeli apo Hamdi Salihi. Artan Bushati, trajneri i Kombëtares U-21 të futbollit, mund të jetë tekniku i “seleksionit” kuqezi, që do të përballet në miqësoren e bujshme me Milanin. Presidenti Duka, pas refuzimit të kroatit Branko Ivankoviç, ende nuk ka zbardhur emrin e teknikut të ri të përfaqësueses A.

NDESHJA
Ndeshja miqësore do të luhet në orën 19:00 në impiantin më të madh sportiv të vendit, që si për koincidencë është projektuar nga arkitektë italianë. Kompania “Taçi Oil” me organizimin e këtij aktiviteti ka për qëllim jo vetëm t'i dhurojë një spektakël të paharrueshëm sportdashësve shqiptarë por me fondet e mbledhura të cilat do të shkojnë në dobi të fëmijëve ne nevojë, të sensibilizojë shoqërinë për më shumë kujdes dhe dashuri për ta. Kundër përfaqësueses “alternative” shqiptare do të luajnë tre “topa të artë”, duke e shndërruar trofeun “Taçi Oil Albania Reads”, në një ngjarje që kalon përmasat sportive. Ato yje që i kanë parë gjithnjë nga televizioni shqiptarët do t'i shikojnë tani direkt në fushë. “Më vjen shumë mirë që një eveniment kaq i madh do të ndodhë për herë të dytë dhe sigurisht edhe në vazhdim”, - ka deklaruar përpara disa ditësh, presidenti i kompanisë “Taçi-Oil”, Rezart Taçi që bën të mundur risjelljen e këtij klubi të madh në vendin tonë.


Kaka dhe Bekam

Nëse në konferencën e parë për shtyp të Milanit në Tiranë, të organizuar në “Hotel Sheraton”, përveç Galianit dhe Ançelotit, kanë qenë prezent edhe dy lojtarët e Milanit, Ronaldinjo dhe Maldini, këtë herë në këtë konferencë për shtyp (ora 16:30), është braziliani Rikardo Kaka dhe i dyti anglezi Devid Bekam.

10 orët e kuqezinjve

Milani do të zbresë në orën 11:45 në aeroportin “Nënë Tereza” dhe do të niset menjëherë për në hotel “Sheraton” ku do të akomodohet. Pas ndeshjes që do të nisë në orën 19:00 në “Qemal Stafa”, do të organizohet një mbrëmje “Gala” ku do të zhvillohet një ankand me disa prej bluzave të lojtarëve kuqezi.

Lista zyrtare
Milani në Tiranë

Paolo Maldini
Rikardo Kaka
Alesandro Pato
Andrea Pirlo
Klarens Sedorf
Masimo Ambrozini
Devid Bekam
Ronaldinjo
Filipo Inzagi
Xhanluka Zambrota
Xhenaro Gatuzo
Marek Jankulovski
Zeljko Kalac
Filip Senderos
Andrij Shevçenko
Tiago Da Silva
Matjë Flamini
Daniele Bonera
Matias Kardiaçio
Mateo Darmian
Tabare Viudez
Felipe Mationi
Filipo Peruçini

Trajner: Karlo Ançeloti
Zëvendëstrajner: Mauro Tasoti
Milan Junior Camp”

Kampingu do të zhvillohet nga data 6 korrik deri më 10 korrik në Tiranë. Në këtë kamping do të marrin pjesë fëmijë nga mosha 8 deri në 16 vjeç. Nga 300-400 fëmijët që do të marrin pjesë, pesë prej tyre do të shkojnë në “San Siro” në fund të muajit gusht.

Vizitë në “San Siro”

Pesë fëmijë të kampingut shqiptar të Milanit gjatë vitit të kaluar, Andriko Gurma, Dean Lici, Mikel Brahlika, Erli Çupi dhe Alketo Gjipali, morën pjesë në shoun e madh të “Milan Junior Day” (MJC), të organizuar në Milano nga data 18 e 19 tetor.

“Milan Camp”
Në datat 16 e 17 maj në sheshin “Nënë Tereza” do të ngrihet kampi “Milan Park Tirana”, ku të gjithë fëmijët se bashku me miqtë e familjet e tyre do të kenë mundësi të argëtohen falas me lojëra të ndryshme virtuale apo dhe karuselë e trena.


Çmimet e biletave
Biletat e tribunës kryesore A, të cilat sezonin e shkuar kanë qenë 15000 lekë, këtë herë do të jenë 10000 lekë. Biletat e tribunës karshi, pra D1 dhe D3, që do të jenë 4000 lekë, ato prapa porte pritet të jenë 2000 lekë.


Tirana
Tirana fitoi 2-1 kundër Milanit të madh, falë golave të Daniel Xhafës e Gjergji Muzakës, ndërsa për Milanin golin e nderit e shënoi Ronaldinjo në fundin e takimit. Tirana, që drjetohej atëherë nga trajneri boshnajko-kroat Bllazh Slishkoviç fitoi kështu trofeun e parë “Taçi Oil Albania Reads”.

Bilanci
Milani është sinonim jo vetëm i lavdisë italiane e futbollit spektakolar, por nga viti 1899 (vit i themelimit) ka në muzeun e tij 17 kampionate në Serinë A, 7 Liga Kampionësh, 3 Kupa Interkontintetale, 1 Botëror për klube, 4 Superkupa Europiane, 5 Superkupa të Italisë, 3 Kupa të Italisë dhe 2 Kupa të Kupave.


AMC, shorte për “Milan Junior Camp”

Kompania e telefonisë celulare, AMC, do të jetë edhe këtë vit partneri institucional i “World Camp International”, duke u bërë pjesë e “Milan Junior Camp”, që do të zhvillohet së shpejti në Tiranë. AMC-ja i ofron mundësinë gjithë abonentëve të saj të bëhen pjesë e shorteut që do të zhvillohet për përzgjedhjen e 80 djemve dhe vajzave nga mosha 6 deri në 14 vjeç. Abonentët e AMC-së mund të dërgojnë një SMS me tekst “AMC” në 15177 deri më datë 15.06.2009 për t'i dhënë mundësinë fëmijëve apo të afërmve të tyre të përfshihen në “Milan Junior Camp” në Tiranë. Çmimi i një SMS-je është vetëm 50 Lek (Pa TVSH). “Milan Junior Camp” është i hapur për djem dhe vajza të moshave 6-14 vjeç. Aktivitetet, të cilat konsistojnë në trajnimin e fëmijëve për lojën e futbollit, do të organizohen në stadiumin “Selman Stërmasi” në Tiranë dhe fushat e Federatës Shqiptare të Futbollit në Kamzë, më 06-10 Korrik. Gjithë pjesëmarrësit do të trajnohen nga trajnerët e AC Milan dhe do pajisen me veshjet zyrtare të këtij klubi ku përfshihen: dy bluza, dy palë çorape, një çantë shpine etj. Në përfundim të trajnimit fëmijët do të përfitojnë edhe diplomën për pjesëmarrjen e tyre në këtë aktivitet. Ceremonia finale e këtij aktiviteti do të zhvillohet në stadiumin “Selman Stërmasi”, më 10 Korrik 2009. Pas trajnimit, 5 më të mirët do të zgjidhen nga trajnerët e Milanit dhe do të kenë mundësi të takojnë lojtarët e Milanit në “San Siro”, para ndeshjeve zyrtare të Serisë A.