Mirdita të gjithve

Rrëfimi i trajnerit të Kombëtares. “Në vitin 2012 dua të shikoj tifozë kuqezi”. Kroati: Shqipëria po bën hapat e parë. Unë kam besim se do ta arrijmë këtë nivel

JORGIS MEMO (Panorama Sport) -Pas humbjes në minutat e fundit me Portugalinë, Josip Kuzhe ka shprehur hapur ambicien e tij si trajner i Kombëtares shqiptare. Gjatë një rrëfimi për jetën, familjen dhe të ardhmen në krye të kuqezinjve, në emisionin “E diela shqiptare”, Kuzhe ka thënë ndër të tjera se ëndrra e tij është që ta çojë Shqipërinë në Evropianin e vitit 2012. “Ëndrra ime është që ta bëj Shqipërinë të jetë pjesëmarrëse në Kampionatin Evropian, që do të zhvillohet në Ukrainë dhe Poloni. Shqipëria po bën hapat e parë për të luajtur në këtë nivel futbolli. Ka shumë lojtarë shqiptarë, të cilët aktivizohen në arenën ndërkombëtare dhe unë jam optimist për këtë. Duke shfrytëzuar këtë talent që ata kanë, kam shumë besim se Shqipëria, në vitet e ardhshme, mund të luajë në nivelet më të larta të futbollit evropian dhe atij botëror. Dëshira ime është që në kampionatin evropian të vitit 2012, të ketë në stadiumet e Ukrainës apo Polonisë, shumë tifozë shqiptarë me ngjyrat kuqezi, për të mbështetur kombëtaren e futbollit, si pjesëmarrëse për herë të parë në këtë kompeticion”, - është shprehur trajneri Josip Kuzhe. Kroati ka folur gjithashtu edhe për 10 ditët e para të punës së tij me kuqezinjtë. “Në ditët e para të punës sime u përpoqa të injektoj mentalitetin e fitores për gjithçka. Unë do mundohem që të punoj profesionalisht. Nëse shikoj që lojtarët nuk do të jenë të mirë me mua, atëherë nuk mund të jetë një atmosferë e mirë. Por nëse ka atmosferë të mirë në skuadër, do të thotë që je kompetitiv, pra konkurrues dhe me shpirt fituesi. Kjo do të ndodhë për çdo ndeshje dhe jo vetëm në një ndeshje. Unë e ndjej që në skuadrën tonë kombëtare do të ketë një atmosferë shumë të mirë”, - ka përfunduar kreu i pankinës shqiptare.

“E keni futbollin në gjak”
“Me Shqipërinë dua që të kem një sukses profesional. Kam ardhur këtu për të fituar. Unë nuk dua që të jetoj në Kroaci dhe informacionin për Shqipërinë ta marrë prej andej. Dua që gjithçka ta bëj nga Shqipëria. Mund të them se jam shumë i lumtur për këto ditët e para që jetoj në Tiranë dhe besoj se do të jem i tillë në vazhdimësi. Që përpara se të vija këtu, e kisha në mendjen time imazhin e një lojtari tipik shqiptar. Mendoj se shqiptarët e kanë futbollin në gjak”, përfundoi trajneri Kuzhe.

Avokat
Përveç se një trajner që ka CV të pasur, jeta e Josip Kuzhesë ka njohur edhe arritje të tjera. Fare mirë, kroati mund të ishte një avokat. “Kam përfunduar Fakultetin Juridik dhe sot mund të isha një avokat i zoti. Midis kësaj dhe futbollit, zgjodha të vazhdoja karrierën si trajner. Jam i lumtur për këtë. Kam pasur shumë eksperienca, madje në Australi, Japoni dhe Afrikë”, tregon Kuzhe.

Familja
Djalit i kërkoi të mos vinte me Portugalinë
Në rrëfimin e tij, trajneri i Kombëtares, Josip Kuzhe, ka treguar edhe për familjen. “Djali donte të vinte për të ndjekur ndeshjen kundër Portugalisë. Meqenëse ishte një ndeshje tepër e rëndësishme dhe unë doja të isha i përqendruar totalisht aty, i thashë që të mos vinte. Ai ka një biznes në Kroaci dhe e ka të vështirë të vijë këtu për të jetuar gjatë gjithë kohës. Por me siguri do të jetë për të parë ndeshjet, herë pas here. Nga ana tjetër, gruaja ime ka shumë dëshirë për të ardhur në Shqipëri, në mënyrë që ne të jetojmë bashkë. Unë dëshiroj të jem sa më profesional dhe dua që të qëndroj këtu”, është shprehur kroati.

Kroati për bixhozin
“Në vend që të tradhtoja gruan, shkova të luaja në kazino”
“Mua më pëlqejnë gjërat normale dhe gjërat e vogla në jetë. Gjatë gjithës jetës sime, më kanë pëlqyer lojëra të ndryshme. Çdo njeri ka histori të mira dhe të këqija. Personalisht kam kaluar histori të mrekullueshme. Kam vetëm një histori të keqe përsa i përket bixhozit. Unë kam shkuar në kazino dhe nuk kam një shpjegim përse e kam bërë këtë. Të gjithë shqiptarët besoj se kanë shkuar në kazino, madje aty kam takuar shumë prej tyre. Kam një teori për veten. Njerëzit jetojnë me disa pasione, siç është dashuria apo seksi. Unë, në vend që të tradhtoja gruan, shkova të luaja në kazino. Tashmë u bënë disa vite që nuk shkoj më aty. Kam një familje të mrekullueshme dhe jam i lumtur për këtë”, ka thënë trajneri i Kombëtares, i pyetur për të kaluarën e tij.


16
ndeshje në të cilat Kombëtarja shqiptare i ka humbur, ose është barazuar në minutat e fundit që prej viteve '80-të e deri te përballja me portugezët.

3
ndeshje, në të cilat Kombëtarja shqiptare ishte në fitore në çastin ku ka pësuar golin në minutat e fundit të ndeshjes. Shqipëri-Ukrainë 2-2, Estoni-Shqipëri 1-1, Norvegji-Shqipëri 2-2.

Sulmuesi: “Trajneri Kuzhe po përqendrohet shumë në krijimin e frymës së grupit. Këtë po e bën në mënyrë teorike dhe në fushë. Kuzhe po kërkon t'ua ngulitë në kokë të gjithë futbollistëve mënyrën se si ndërtohet një grup i fortë"

Sulmuesi Hamdi Salihi, autor i 14 golave me skuadrën e tij në SV Ried në Austri, pohoi se forca e Portugalisë njihet nga të gjithë, dhe nuk ka nevojë të komentohet gjatë. “Aq më tepër që këtë radhë u duhet patjetër fitorja, - shtoi shkodrani. “Është e vetmja rrugë që i çon drejt kualifikimit për në Botëror. Ky presion që ekziston në kampin portugez na favorizon. Mungesa e golave të kombëtares është një pikë ku mund të diskutohet gjatë. Te Riedi kam kaluar formë të mirë, kam shënuar rregullisht dhe dëshiroj që këtë ta bëj edhe me kombëtaren”, - theksoi Salihi, autor i vetëm një goli me Kombëtaren në një miqësore kundër Maltës.


“Trajneri Kuzhe po përqendrohet shumë në krijimin e frymës së grupit. Këtë po e bën në mënyrë teorike dhe në fushë. Kuzhe po kërkon t'ua ngulitë në kokë të gjithë futbollistëve mënyrën se si ndërtohet një grup i fortë. Duhet vlerësuar puna e të gjithë trajnerëve të kombëtares. Bariçi, me të cilin kemi arritur rezultate shumë të mirë, duhet vlerësuar në maksimum. Ari Hani ka qenë për një kohë të shkurtër, u largua për rezultate të dobëta, por ne nuk duhet ta përbaltim punën e tij. Kuzhen do ta vlerësojmë pas disa ndeshjeve. Shturmi? Më është bërë ofertë konkrete nga Shturmi, por edhe nga skuadra të tjera. Deri në gusht mund të ndodhë gjithçka”, - përfundoi një nga katër sulmuesit që ka në dispozicion Kuzhe, së bashku edhe me Bogdanin, Kapllanin e Berishën.

“Që pas takimit të parë me drejtuesit shqiptarë pashë se lashë një përshtypje shumë të mirë. FSHF ka mendim të jashtëzakonshëm për Oto Bariçin. Në garë edhe kroati tjetër, Vlak

Bledar KUKA- Josip Kuzhe e kishte një bindje të fshehtë brenda vetvetes që pas takimit të parë me drejtuesit e Federatës Shqiptare të Futbollit (FSHF) se do të ishte ai trajneri i ri i Shqipërisë. Këtë e rrëfen në një intervistë për gazetën kroate, “Jutarnji List”, së cilës i tregon edhe ndikimin vendimtar të Oto Bariçit.

Kroati shpjegon se pati një takim dyorësh me shqiptarët (normalisht me presidentin Armand Duka). “Besova që pas takimit të parë që prezantimi im dyorësh la përshtypje të mirë tek drejtuesit e federatës, - shprehet Kuzhe, - por më pas u shfaqën kandidatë të tjerë si dhe hynë në histori edhe njerëz të futbollit që nuk janë në atë lartësi që duhen (të ashtuquajtur menaxherë).

Në listën e 35 emrave ishte edhe një kroat që nuk është shfaqur në shtyp, por që gazeta “Korrieri” e ka përfshirë në një listë trajnerësh kroatë që mund të vëzhgoheshin për kombëtaren, listë botuar më 21 prill të këtij viti. Bëhet fjalë për Marijan Vlakun, trajnerin 54-vjeçar që aktualisht është pa detyrë, por që deri në fillim të marsit të këtij viti ishte në krye të Dinamos së Zagrebit.

Takimi i përmendur më sipër mes Dukës dhe Kuzhes ka ndodhur 3 javë para se presidenti i FSHF-së të bënte zgjedhjen, pra rreth datës 29 prill. Sërish në vendimin e Dukës ndikoi fjala e legjendarit Oto Bariç, që largoi si me magji jo vetëm konkurrentët e tjerë, por edhe dyshimet lidhur me të kaluarën e turbullt të Kuzhes jashtë futbollit.

“Drejtuesit e Federatës Shqiptare të Futbollit kanë mendim të jashtëzakonshëm për Bariçin, - u shpreh Kuzhe, - shumë herë më përsëritën se çfarë trajneri i shkëlqyer u tregua ai dhe sesa ndikim pati në zhvillimin e kombëtares shqiptare. Oto foli mirë për mua dhe këshillat e tij patën ndikim vendimtar”.

Gazeta kroate bën shaka me numrin e madh të kandidaturave për detyrën e lënë në mes nga Ari Hani. “Kjo maratonë bisedimesh u shenjua nga invazioni i kandidatëve, a thua se shqiptarët e kërkuan nëpërmjet portalit “mojposao” (puna ime – adresë kroate për kërkim pune).

Kuzhe thotë se parashikon që të punojë për 2.5 vjet në Tiranë, ndërsa pohon se njeh të paktën dy lojtarë shqiptarë me të cilët ka punuar, Erion Bogdanin dhe Ervin Skelën. Me Bogdanin punuan tek NK Zagrebi ndërsa me mesfushorin e sotëm të Kotbusit kur ky ishte te Kemniceri.


--------------------------------------------------------------------------------

“Portugalia, Danimarka, Suedia kanë rëndësi”

“Viti i parë, - thotë Kuzhe, - është vit njohjeje dhe rrahje mendimesh. Skuadra nuk ka mundësi të shkojë në Botërorin e Afrikës së Jugut, por kjo nuk do të thotë se ndeshjet ndaj Danimarkës, Portugalisë dhe Suedisë nuk kanë rëndësi. Në fund të fundit, na intereson rezultati sportiv”.

--------------------------------------------------------------------------------


Kuzhe sjell edhe trajnerin e Shpresave: Xhemal Mustedanagiç

-Duket se trajnerët kroatë do të marrin krejtësisht përgjegjësinë në futbollin shqiptar sepse keni propozuar si trajner të Shpresave Xhemal Mustedanagiçin, aktualisht skaut i Dinamos së Zagrebit.
“Besoj se do të jetë trajner i ekipit të Shpresave, por nëse kjo për arsye të ndryshme nuk bëhet, ai do të jetë ndihmësi im”.

-Thuhet se Federata Gjermane e Futbollit ndërhyri për të caktuar një trajner të sajin (ndoshta Lorantin apo Zidken).

“Trajnerët kroatë janë mes më të mirëve në botë, E di që kur kam qenë në Japoni. Problemi është se skena kroate është e vogël. Nuk kemi kaq shumë marketing, federata jonë nuk ka kaq fuqi sa disa federata të tjera evropiane apo botërore”.

-Pse kaq shumë emra trajnerësh kroatë në listën shqiptare?

“Shqiptarët këmbëngulën që trajneri të ishte nga këto anë. Kanë pasur edhe gjermanë e holandezë, por Oto Bariç ka lënë shenjë të thellë”.

-Një pyetje jo e këndshme. A prishi punë e kaluara juaj?

“Nuk dua të flas për jetën private. Askush nuk ka të drejtë të hyjë në të. Kam një familje të shkëlqyer, ku jetoj i lumtur, plot me dashuri. Shumëkush do të ishte me fat të kishte një familje të tillë. Gjithnjë kam mbështetje, familja është forca ime”.

-Kur shkoni në Shqipëri?

“Të premten (sot). Synimi ynë është i përcaktuar, eliminatoret e Euro 2012. Shqipëria është aktualisht “klasë e katërt” në eliminatoret evropiane, por ka shumë lojtarë të rinj interesantë, ka shumë ambicie ndaj edhe për mua kjo kombëtare është nxitje e madhe. Besoj se do të bëj punë të mirë”.
Përgatiti nga “Sportalica.net” Bledar Kuka


Bariç: Shqiptarët deshën Bllazheviçin, Kranjçarin

“Josip Kuzhe ishte veçse opsioni i tretë i shqiptarëve”. Kështu shprehet Oto Bariç për gazetën “Javno”. “Më pyetën për Çiron (Mirosllav Bllazheviçin), por u thashë se ai është me Bosnjë-Hercegovinën, pastaj më pyetën për Cicon (Zllatko Kranjçarin), i thashë se kishte shkuar në një klub sllovak, pastaj më pyetën për Kuzhen dhe i thashë se është njeriu i duhur”, - shpjegon Herr Oto.

“Ata (shqiptarët) janë kombëtare e rangut të tretë ose të katërt në Europë dhe në grup gjithnjë kanë dy ose tri kombëtare të forta, - vazhdon Oto Maksimale, - por kjo nuk e pengon federatën shqiptare që të synojë gjithnjë kualifikimin për në një turne të madh”. Më pas ai shton se “pikërisht kjo ishte arsyeja që ika sepse nuk mund t'u premtoja një sukses të tillë me një kombëtare që realisht nuk e ka atë cilësi që të ndodhet mes më të mirave”.


Xhemal Mustedanagiç: Synojmë Euro 2012-ën

Ai që ende nuk është bërë as ndihmës i Kuzhes dhe as trajner i Shqipërisë U21, pra Xhemal Mustedanagiç, jep deklarimet e para si “shqiptar”. Gazeta “Javno” e telefonon dhe ai hidhet menjëherë në sulm: “Këtë edicion nuk ka shanse, por në eliminatoret e Euro 2012-ës duhet të synojmë gjëra më të mëdha, historike”. “Mund të jem trajner i Shqipërisë U21, skaut ose ndihmës i Kuzhes siç kemi bërë tek Dinamo me Eduardon, Çorlukën, Modriçin e të tjerë”, - përfundon ai.

Kroati njihet për pasionin e tij për paratë, për të cilat braktisi Ruandën. “Kumarxhiu”: “Kam stërvitur Bogdanin, Bariç më rekomandoi Shqipërinë”

“I kam të gjitha cilësitë e duhura për të drejtuar Shqipërinë, për të përzgjedhur lojtarët dhe bërë një ekip të mirë. Synimi im është që ta përmirësojë sa më shumë këtë ekip. Kam ambicie të mëdha”. Deklarata është e trajnerit kroati Josip Kuzhe (57 vjeç, 27 vjet eksperiencë si trajner), që mesa duket ka fituar “betejën” me bashkëkombasin e tij Ilija Lonçareviç (65 vjeç) dhe austriakut Peter Pakult (50 vjeç) për vendin vakant në krye të Kombëtares pas shkarkimi të holandezit Ari Han (15 prill 2009).

Ish-trajneri kampion i Dinamos së Zagrebit (2006), por me një eksperiencë punë në Gjermani, Australi e Japoni, i vlerësuar si një teknik inteligjent, pati një takim “kokë më kokë” me presidentin e Federatës Shqiptare të Futbollit, Armand Duka, me të cilin mesa duket ka gjetur dhe akordin formal, që rezultoi edhe një konferencë të improvizuar shtypi në ambientet e selisë së futbollit shqiptar, ku shfaqi edhe disa nga idetë e tij.

“Gjithë kohës që Oto Bariç ka qëndruar në Shqipëri, kam ndjekur vazhdimisht rezultatet e kombëtares suaj. Bariç më ka folur gjithmonë shumë mirë për futbollin shqiptar. Ishte ai që më shprehu dëshirën që unë të bëhesha trajneri i Shqipërisë, duke më shpjeguar shumë gjëra të tjera”, - tha Kuzhe, për të cilin ka dhënë konsiderata pozitive edhe ish-trajneri i Kombëtares shqiptari, Oto Bariç.

“Synimi më i madh për mua është, që nëse do të jem në krye të Shqipërisë, parësore është të kem rezultate. Oto Bariç më ka shpjeguar që me Shqipërinë mund të kesh arritje të mëdha”, - thkesoi Kuzhe.

Tekniku i ri (me 90 përqind Kuzhe), i pesti që do të drejtojë Shqipërinë që nga viti 2002, do të udhëheqë Kombëtaren shqiptare të futbollit për tri ndeshjet e mbetura për eliminatoret e Botërorit 2010 e komplet fushatën kualifikuese të Kampionatit Europian 2012.

Kuzhe, një adhurues i yllit të Milanit, brazilianit Kaka, ka pranuar mesa duket 300 mijë eurot e kontratës e e me “sakrificën” për ca muaj më shumë qëndrimi në “karantinën” shqiptare.

“Kam qenë unë ai që kam marrë Erjon Bogdanin të Rijeka në vitin 1999, duke besuar se ai ishte një lojtar i talentuar. profili që unë kam në kokë për një futbollist si Erion Bogdani, më ndihmon shumë për të krijuar një ide për lojtarët e tjerë shqiptarë.

"Mua më pëlqen individualizmi te lojtarët dhe për këtë mund të them se lojtarët shqiptarë janë individualistë të mirë. Janë të bukur në lojën e tyre, janë atraktivë. Por në anën fizike, pra të kondicionit të tyre, janë mundësitë për t'u përmirësuar”.

Më 6 qershor, Shqipëria do të ndeshet me Portugalinë për eliminatoret e Botërorit, dhe trajneri i ri ka vetëm 20 ditë në dispozicion për të përgatitur ndeshjen, teksa është e natyrshme që lista e lojtarëve do t'i propozohet nga FSHF-ja.

“Synimi më i madh për mua është, që nëse do të jem në krye të Shqipërisë, parësore është të kem rezultate. Oto Bariç më ka shpjeguar që me Shqipërinë mund të kesh arritje të mëdha. Siç e tha edhe presidenti (Duka), unë jam një nga kandidatët e mundshëm për të drejtuar kombëtaren.

"Nëse do të jem trajner i Shqipërisë, vij për dy arsye tepër të forta: së pari, për anën profesionale dhe së dyti, dua të fitoj në drejtimin e Shqipërisë. Dua të arrij rezultate shumë të mira. Jam i lumtur nëse do të jem dhe se dua që të jetoj në Shqipëri, për t'i njohur sa më mirë njerëzit këtu. Dua që të ndihem mirë dhe të punoj për të arritur rezultate, sepse Shqipëria ka shumë talente”.

Kuzhe, i njohur edhe nofkën “kumarxhiu”, për shkak të pasionit të tij të hershëm për ruletin, ka drejtuar vetëm për pak muaj përfaqësuesen e Ruandës (tetor 2007-janar 2008), pavarësisht se federatën e vendit afrikan kishte nënshkruar një kontratë 3-vjeçare, duke zëvendëduar në detyrë gjermanin Mikael Nees, pasi ky i fundit nuk arriti ta kualifikojë Ruandën në finalet e Kupës së Afrikës 2008.

Në turneun e parë me Ruandën (Sesafa Cup të luajtur në dhjetor 2007 në Tanzani), arriti ta shpallë skudrën e tij nënkampione, duke humbur me penallti pas rezultatit 2-2 në kohën shtesë. Kuzhe tha atëherë për radion britanike “BBC”, se ai ndihej krenar për arritjen e tij.

“Ne humbëm me penallti, pavarësisht se ne e meritonim të fitonim. Është një arritje e madhe për ne të arrijmë në finale. Tani ne duhet të përgatisim ekipin për kualifikueset e Kampionatit Botëror 2010”.

Gjithsesi, Kuzhe e braktisi Kombëtaren e Ruandës (6 ndeshje; 4 fitore, 1 barazim, 1 humbje) pas vetëm dy muajsh punë, për t'ui drejtuar Japonisë, nga ku mori një ofertë prej 270 mijë eurosh në sezon prej JEF Junaitid.

Sipas deklaratave të Kuzhes në gazetën kroate “Jutarni List”, ndarja me Ruandën ishte miqësore, ndërkohë që theksoi se “kaloi dy muaj të shkëlqyer në Ruanda, por nuk mund të refuzonte ofertën surprizuese të Japonisë”.

Kuzhe u shkarkua nga drejtimi i skuadrës japoneze pas vetëm katër muajsh punë pas një humbjeje 3-0 kundër Uravës. Gjithsesi, Kuzhe gëzoi simpatinë e disa trajnerëve në Japoni. “Ai e nisi punën nga zero, pasi ekipit iu larguan disa lojtarë, por dhe klubi ndryshoi gjithë stafin e presidentin”, - tha Gertt Engels, trajneri i Uravës.

Ende nuk dihet më saktësi, nëse do të jetë Kuzhe trajneri i Shqipërisë, dhe a do ta braktisë ai Kombëtaren tonë, nëse ndonjë ekip do t'i ofronte pak më shumë se 300 mijë euro për dy vite punë.

Gjashtë gola, nga tre për çdo ekip “çmendin” 12 mijë shikues në “Qemal Stafa”. Elvin Beqiri gaboi në penalltinë fatale, Milani fiton trofeun “Taçi Oil”

Nga stadiumi “Qemal Stafa”, Dash Frashëri- “Gjahtari i golave”, Pipo Inzagi, me goditjen e pagabueshme nga seria e penalltive (5-4), ndihmoi Milanin të fitonte për herë të parë trofeun ndërkombëtar “Taçi Oil Albania Reads”, ndryshe nga tetori i vitit të kaluar kur humbi me Tiranën (2-1), por Shqipëria “B”, me talente premtues si Vila, Muzaka e Salihi, ia doli të mbyllte 90 minutat e kohës së rregullt me një rezultat joshës 3-3, ku për kuqezinjtë italianë shënuan dy fituesit e “Topit të artë”, Ronaldinjo e Shevçenko si dhe Filipo Inzagi. Shqipëria (ende pa trajner zyrtar) zhvilloi një lojë të pëlqyeshme, duke përmbysur disavantazhin 0-2. Trofeun kapitenit të Milanit në pjesën e dytë, Inzagit, ia dorëzoi Presidenti i Republikës, Bamir Topi, i cili tha gjatë ceremonisë se “dalim të gjithë të emocionuar pamë spektakël, me një ekip të madh si Milani. Urime fituesit, pro dhe ne kemi një skuadër të madhe”. Dorëzimi i trofeut u shoqërua me një shi fishekzjarrësh e me një duartrokitje të fuqishme për një mbrëmje të madhe e të jashtëzakonshme.

PJESA E PARË

Trajneri i Shqipërisë, Artan Bushati, luajti me dy sulmues të mirëfilltë, duke hedhur në vijën e parë Hamdi Salihin e Migen Memellin, të mbështetur nga Dorian Bylykbashi e Klodian Duro, në rolin e tij natyral të fantazistit. Nga ana e tij, trajneri i Milanit, Karlo Ançeloti, i besoi sulmin nga minuta e parë Patos e Shevçenkos, me Ronaldinjos pas dhe Pirlon në rolin e regjisorit fuqiplotë të lojës. Kaka, Bekam e Sedorf u kursyen për pjesën e dytë.
Në minutën e 4-t, mesfushori i Dinamos, Elis Bakaj lëshoi një top nga e majta për sulmuesin Migen Memelli, ky i fundit e goditi me kokë brenda zonës milaneze, por topi u largua pa asnjë rrezik nga Milani. Në të 8', Dorian Bylykbashi lëshoi një top për Hamdi Salihin, sulmuesi shkodran ndërmorri një lëvizje vertikale drejt qëndrës, duke goditur fort nga 18 metra, por Kalac ishte në pozicion. Në dhjetë minutat e para, disa veprime virtuoze të Ronaldinjos ngrohin atmosferën në stadium, që deri në atë moment ishte shumë i ftohtë.
Në minutën e 16-të, Klodian Duro u zhvendos bukur në këndin e djathtë të sulmit tonë, pasoi me zgjuarsi për Hamdi Salihin, ky i fundit bëri një rotullim të bukur me topin brenda zonës së vogël, por sfera e goditur ulët nga shkodrani doli jashtë kuadratit. Dy minuta më pas gjatë një tentative për të larguar topin, pas një kërcimi të fuqishëm me kokë, Vrapi dëmtoi pak Andrea Pirlon, por futbollistët shkëmbejnë duart miqësisht.
Minuta e 20-të prodhoi edhe një super-kombinacion midis Pirlos e Ronaldinjos, braziliani bëri xhonglimin tradicional të tij, duke u ndërfutur midis Beqirit e Vrapit, por Sheva u zu në pozicion jashtë loje brenda zonës sonë.
Minuta e 22-të. Shqipëri-Milan 0-1. Pas një gabimi të Vangjelit, Antonini zotëroi topin brenda zonës sonë, kombinoi mënjeherë me Ronaldinjon, e braziliani shënoi me një veprim të zgjuar, duke goditur në mënyrë cinike në anën e djathtë të portës së mbrojtur nga portieri i Palermos, Samir Ujkani.
Në fundin e pjesës së parë, Pato i shpëtoi mbulimit të Vrapit, ky i fundit e ndërpreu në mënyrë të parregullt dhe gjyqtari Lorenc Jemini dha faull. Pato gjuajti nga 25 metra, por goditja e brazilianit ishte shumë jashtë kuadratit.

PJESA E DYTË
Fraksioni i dytë nisi me Kakanë e Sedorfin në fushë, ndërsa Inzagi bëri nxehjen në pistë. Pa kaluar tri minuta nga pjesa e dytë Milani shënoi golin e dytë me anë të ukrainasit Andrij Shevçenko, ish-sulmuesi i Celsit mori një top nga Kaka, dhe me një supergoditje ia rrëshqiti topin mes shalës Ujkanit të “vogël”, duke sjellë edhe të qeshura në stadium. Shqipëri-Milan 0-2.
Në minutën e 64-t, anësori i Tiranës, Gjergji Muzaka dha një pas të artë për Vilën, talenti i ri durrsak tregoi klasin e tij, duke shënuar një gol për manual në portën e Milanit, e duke rritur adrenalinën ën shkallët e tifozëve, të cilët thirrën pareshtur “Shqipëri...Shqipëri!”. Shqipëri-Milan 1-2.
Një gol i merituar i Vilës, që padyshim ka për ta mbajtur gjatë në kujtesë, pasi u realizua pikërisht në debutimin e tij të parë me fanellën e Kombëtares. Durrsaku 20-vjeçar shndërrohet kështu në një nga shpresat më të mëdha të futbollit shqiptar, pavarësisht se këtu flitet vetëm për një ndeshje miqësore ndërkombëtare, por në një ndeshje kundër Milanit të madh.
Kuqezinjtë tanë rrisin presionin, ndërkohë që Ançeloti fut Inzagin në vend të Shevçenkos, ndërsa doli edhe Ronaldinjo në minutën e 69-të. Në minutën e 70-të, Muzaka realizoi një tjetër kryevepër, duke i çuar shifrat në 2-2 brenda gjashtë minutave. Shqipëri-Milan 2-2. Goli i dytë i Muzakës kundër Milanit, përfshirë edhe atë në fitoren 2-1 të Tiranës tetorin e vitit të kaluar.
Në të 75', erdhi radha e Salihit për të firmosur golin e radhës. Klodian Duro veproi bukur brenda zonës nga e djathta e sulmit tonë, krosoi ëmbël për Salihin dhe aty shkodrani me një goditje perfekte me kokë çoi në delir tifozerinë shqiptare. Shqipëri-Milan 3-2
Në minutën e 88-të, Kaka dëshnmoi klasin e tij, duke kaluar si “piramida” mbrojtësit tanë e duke nxjerrë përballë portës “gjahtarin” e golave, Pipo Inzagin, ky i fundit nuk fali, duke vendosur shifrat në 3-3. Një gol me të vërtetë i mrekullueshëm nga ana e Milanit. Në minutën e 92-të, Hyka u tregua një magjistar i vërtetë, me driblimin e tij, pasoi djathtas te Muzaka, ky krosoi drejt portës, e aty Franc Veliu goditi bukur me kokë, por pa mundur të shënojë.

PENALLTITË
Me ndeshjen e mbyllur në barazim 3-3, dy skuadrat iu drejtuan gjuajtjeve të penalltive për të përcaktuar fituesin e trofeut të dytë “Taçi Oil Albania Reads”. Kaka goditi i pari nga pika e bardhë, duke shënuar për Milanin, 1-0. Pisha ishte i pari që gjuajti i pari për Shqipërinë, duke shënuar edhe ai, 1-1. Sedorf për Milanin shënoi me një gjuajtje të bukur teknike, 2-1. Muzaka realizoi, 2-2. Francezi Flamini, 3-2. Vila, i jashtëzakonshëm, 3-3. Tiago Silva, 4-3. Vrapi, 4-4. Pipo Inzagi, 5-4. Elvin Beqiri, gabon duke e nxjerrë jashtë mbi traversë topin. Milani fitoi me penallti 5-4, duke fituar edhe trofeut të dytë “Taçi Oil Albania Reads”. Kupën e argjendtë, prej 7kg e të prodhuar në Itali, iu dha Milanit nga presidenti i Republikës, Bamir Topi, në një sfond muzikor me kolonën zanore të Milanit.


SHQIPËRI-MILAN 3-3
Shënues: Vila, Muzaka, Salihi/ Ronaldinjo, Shevçenko, Inzagi 88'
Me penallti Milani fitoi 5-4. Elvin Beqiri humbi penalltinë e fundit për Shqipërinë.



12 mijë tifozë

Rreth 12 mijë të pranishëm në “Qemal Stafa”, ku mbizotëronte ngjyra e kuqe brohoritën fort golat e Milanit, të realizuar nga Ronaldinjo e Shevçenko e Inzagi, por edhe për golat e jashtëzakonshëm të Emiljano Vilës, Gjergj Muzakes e Hamdi Salihit. Në “Qemal Stafa” ishin të pranishëm grupimi “Tifozat Kuq e Zi”, “Red Black sincë 1443” dhe “Fanatics” të Tiranës. Edhe ndonjë “Milan vafan...” u dëgjua në ndonjë rast.

Soni “ndez” Ronaldinjon

Këngëtarja e njohur Soni Malaj, e veshur në mënyrë provokuese në një fustan shumë të hapur rozë në version seksi, përformoi përpara startimit të ndeshjes, nën vështrimin e “epshëm” të Ronaldinjos, Pirlos, por dhe të “ashprit” Xhenaro Gatuzo, kapiteni i Milanit në këtë miqësore. Nga Shqipëria shiritin e kapitenit për herë të parë e mbajti Klodian Duro.

Ançeloti “ngatërron” udhëzimet

Në pushimin e ndeshjes, nën tingujt e ëmbël të bukuroshes Soni Malaj, e shoqëruar nga dy vajza të hijshme, Ançeloti u dha udhëzimet e rastit Kakasë e Flaminisë, por duke kthyer disa herë kokën nga Soni. Edhe Sedorf nuk mund t'i mungonte listës së admiruesve të këngëtares shqiptare.

“Nxehet” Kaka dhe buzëqesh

Dalja në nxehje e yllit brazilian Riki Kaka u prit me duartrokitje frenetike nga tifozët. Fituesi i “Topit të artë” iu kundërpërgjigj me buzëqeshje dhe përshëndetje me duar. Sedorf, nga ana e tij bëri disa vrapime të shpejta në pistë, duke entuziazmuar tifozët e tribunës D1. Në nxehje ishte edhe Zambrota, Flamini.

Kaka jep autografe për “Kaka”

Disa fëmijë të ngarkuar për t'u ngarkuar për të kapur topat arritën të merrnin autografe nga Kaka, por më i veçantë ishte një fëmijë i vogël, rreth 4 vjeç, i cili ishte veshur me një bluzë të Milanit me numrin 22, numrin e emrin e Kakasë. Braziliani i sheh numrin dhe i jep një autograf me shumë kënaqësi. Ronaldinjo u pushtua nga dhjetëra fëmijë, e po kështu edhe Shevçenko.

Dy çeqe, 80 mijë euro

Në pushim të ndeshjes, Presidenti i “Taçi Oil”, Rezart Taçi, administratori i Milanit, Galiani, dy çeqe në vlerën e 30 mije eurove për “UNICEF”-in dhe 50 mijë euro për fondacionit të fëmijëve shqiptarë “Domenico Scaglione”. Zonja Liri Berisha dha nga a saj dhurata për Galianin e Taçin.

Tribuna “VIP”

Presidenti i Republikës, Bamir Topi, nuk kishte si të mungonte. “Rolin” e kryeministrit Berisha e luajti bashkëshortja e tij, Liri Berisha. Një numër i konsiderueshëm ministrash ishin të pranishëm në ndeshje, për të mos harruar deputetët.

Jemini mban premtimin

Gjyqtari i takimit Lorenc Jemini, një tifoz i thekur i Juventusit, kishte “premtuar” para medias se do t'i nxirrte një karton të verdhë Kakasë, sapo t'i jepej mundësia. Shkaku është intrigues. Gruaja e gjyqtari është tifoze e çmendur e Milanit dhe personalisht Kakasë. Jemini nuk hezitoi ta ndëshkonte, duke sjellë edhe të qeshura në stadium.